कराड : कराड तहसील कार्यालयातील सेतू केंद्राचा ठेका एका कंपनीला देण्यात आलेला आहे. त्या कंपनीच्या व्यवस्थापकाने नियमावलीची काटेकोरपणे अंमलबजावणी करणे गरजेचे असताना देखील त्याकडे जाणीवपूर्वक दुर्लक्ष केले जात आहे. तसेच सेतू केंद्रामध्ये व्यवस्थापकाच्या बगलबच्चांची उठ बस ही नेहमीचीच झालेली आहे. त्यामुळे येणा जाणाऱ्या सामान्य जनतेला याचा नाहक त्रास सहन करावा लागत आहे. सेतू केंद्रांमध्ये विनाकारण व्यवस्थापकाच्या मर्जीतील लोक वावरत असल्याने कर्मचाऱ्यांना सुद्धा काम करताना अनेक अडचणींचा सामना करावा लागत आहे. याबाबत वरिष्ठ अधिकाऱ्यांनी तात्काळ लक्ष घालून सेतू ठेकेदाराला त्याच्या नियमानुसार काम करण्याची समज द्यावी अशी मागणी सर्वसामान्य जनतेतून होत आहे.
रिद्धी कार्पोरेट सर्विसेस प्रायव्हेट लिमिटेड या कंपनीस कराड तहसील कार्यालयातील सेतू ठिका चालण्यासाठी देण्यात आलेला होता हा ठेका देते वेळेस कंपनीचे व्यवस्थापक यांच्याबरोबर उपजिल्हाधिकारी सो सातारा यांनी करार केलेला आहे या करारामध्ये आपले सरकार सेवा (सेतू) केंद्रामध्ये काम करणाऱ्या कर्मचाऱ्यांची फोटोसह यादी उपविभागीय अधिकारी, तहसीलदार कार्यालय व जिल्हा सेतू समिती सातारा यांच्याकडे देण्याचे संस्थेवर बंधनकारक असणार आहे तसेच सेतू केंद्राचे काम करणारे कर्मचारी यांनी संस्थेचे ओळखपत्र जवळ बाळगणे बंधनकारक राहील असे करारामध्ये नमूद असताना कराड तहसील कार्यालयातील कोणत्याही सेतू केंद्राच्या कर्मचाऱ्यांच्या गळ्यामध्ये ओळखपत्र दिसून येत नाही त्यामुळे सेतू कार्यालयाचे कर्मचारी कोण व सेतू व्यवस्थापकाचे जोडीदार कोण याबाबत लोकांच्यामध्ये संभ्रम निर्माण होत आहे.
त्याचबरोबर सेतू व्यवस्थापक यांनीही त्यांचे ओळखपत्र स्वतः जवळ बाळगणे गरजेचे असताना ते ही ओळखपत्राचा वापर करत नाहीत. त्यामुळे सेतू केंद्राचा व्यवस्थापक कोण आहे कर्मचारी कोण आहे व व्यवस्थापकाचे मित्रमंडळी कोण आहेत हे कोणालाही समजून येत नाही.
सेतू केंद्रांमध्ये अधिकारी यांची नियुक्ती आहे. परंतु त्यांच्याकडे सेतूचा व रेकॉर्डचा चार्ज असल्याने त्यांना दोन्हीकडेही लक्ष द्यावे लागत आहे. ज्यावेळी अधिकारी सेतू केंद्रामधून रेकॉर्ड रूम कडे जातात त्यावेळी त्यांच्या खुर्ची वरती सेतू व्यवस्थापक बसत असतो मग नक्की ती खुर्ची अधिकाऱ्यांच्यासाठी आहे की सेतू व्यवस्थापनासाठी आहे हा प्रश्न पडतो. जर ती खुर्ची अधिकाऱ्यांच्यासाठी नाही तर अधिकाऱ्यांना तिथे कुठे बसवले जाते का त्यांना सेतू केंद्रामध्ये बसण्याचा अधिकार नाही असे अनेक प्रश्न उपस्थित होत आहेत. ज्या खुर्ची वरती अधिकारी बसतात त्या खुर्चीच्या शेजारी आणि खुर्च्या असतानाही सेतू व्यवस्थापक हा त्याच खुर्चीवरती का बसत आहे मग तो अधिकाऱ्यांच्या पेक्षाही मोठा आहे का त्याला त्या खुर्चीवरती बसण्याचा अधिकार कोणी दिला याची चौकशी होणे गरजेचे आहे.
कराड तहसील कार्यालयातील सेतू केंद्र हे नेहमीच चर्चेत राहिले आहे. या ना त्या कारणाने तिथे रोज किरकोळ वाद उफाळून येत असतात. सेतू ठेकेदाराने नियमावलीच काटेकोरपणे अंमलबजावणी केली तर या गोष्टींना आळा बसेल आणि सर्वसामान्य जनतेला लवकरात लवकर त्यांचे दाखले मिळण्यास मदत होईल. मात्र, व्यवस्थापकाने आपली बगलबच्ची सेतू केंद्राच्या बाहेर ठेवून सेतू केंद्रामध्ये आपली जबाबदारी पार पाडावी अशी मागणी सर्वसामान्य जनतेतून होत आहे.
पुढील भागात – सेतू केंद्रासाठी व्यवस्थापक नक्की किती ?
