कराड ः पेट्रोल पंपामध्ये पेट्रोल भरण्यासाठी दुचाकीवरून आलेल्या दोन युवकांनी पंपावरील कर्मचाऱ्यावर कोयत्याने वार केले. त्यानंतर दरोडेखोरांनी कर्मचाऱ्या जवळील सुमारे सव्वा लाखाची रोख रक्कम घेऊन तेथून पलायन केले. सोमवार दिनांक 10 रोजी रात्री एक वाजण्याच्या सुमारास वाठार तालुका कराड गावच्या हद्दीतील गणेश पेट्रोलपंपावर दरोड्याचा हा धक्कादायक प्रकार घडला. दरोडेखोरांनी केलेल्या हल्ल्यामध्ये पेट्रोल पंपावरील कर्मचारी जखमी झाला आहे. परशुराम सिद्धार्थ दुपटे असे जखमी झालेल्या पेट्रोल पंपावरील कर्मचाऱ्यांचे नाव आहे.
याबाबत पोलिसांनी सांगितले की, वाठार ता. कराड गावच्या हद्दीत महामार्ग लगत ऋषिकेश पांडुरंग गावडे यांच्या मालकीचा गणेश पेट्रोल पंप आहे. या पेट्रोल पंपावर सोमवारी मध्यरात्रीच्या सुमारास कर्मचारी परशुराम दुपटे येणाऱ्या वाहनांना पेट्रोल देण्याचे काम करत होते. दरम्यान रात्री बारा वाजण्याच्या सुमारास दुचाकीवरून दोन युवक पेट्रोल पंपामध्ये पेट्रोल भरण्यासाठी आले. त्या युवकांनी परशुराम दुपटे यांच्याकडून दुचाकी मध्ये पेट्रोल भरून घेतले. त्याचवेळी दुचाकी वरती पाठीमागे बसलेल्या युवकाने दुपटे यांना पेट्रोलचे पैसे दिले ते पैसे घेऊन दुपटेे आपल्याजवळील बॅगमध्ये ठेवत असतानाच पाठीमागील युवकाने शर्टातून आणलेला कोयता काढून दुपटे यांच्या अंगावर पायावर हातावर सपासप वार केले ते वार चुकवत दुपटे यांनी तेथून पळ काढला त्याच वेळी दरोडेखोराने दुपटे यांच्या हातातील बॅग हिसकावून घेऊन दुचाकीवरून तेथून पलायन केले. त्या बॅगमध्ये एक लाख वीस हजार 935 रुपये दरोडेखोरांनी पळवून नेले. घटना घडल्यानंतर याबाबत पेट्रोल पंपाचे मॅनेजर निलेश तावरे व मालक ऋषिकेश गावडे यांना याबाबतची माहिती दिली. त्यानंतर मॅनेजर निलेश तावरे यांनी कराड तालुका पोलीस ठाण्यात याबाबतची तक्रार दिली. पेट्रोल पंपावर दरोडा पडल्याची माहिती मिळताच कराड तालुका पोलीस ठाण्याचे पोलीस निरीक्षक महेंद्र जगताप यांनी आपल्या कर्मचाऱ्यांसह त्वरित घटनास्थळी धाव घेतली. तेथील सीसीटीव्ही फुटेज तपासून तपासाच्या अनुषंगाने पोलीसांची तीन पथके रवाना झाली आहेत. दरम्यान महामार्गालगत असलेल्या पेट्रोल पंपावर दुचाकीवरून आलेल्या दोन युवकांनी दरोडा टाकल्याने खळबळ उडाली आहे
