एकनाथ शिंदेंना जीवे मारण्याची धमकी देणाऱ्या मामा-भाच्याच्या जोडगोळीस अटक ; मुंबई एटीएसची कारवाई
मुंबई : राज्याचे उपमुख्यमंत्री एकनाथ शिंदे यांच्या गाडीला बॉम्बने उडवून देण्याच्या धमकीचे प्रकरण समोर आले होते. आता या प्रकरणी मोठी माहिती समोर आली आहे. या प्रकरणी पोलिसांनी तपासाची चक्रे फिरवून दोघांना ताब्यात घेतले असल्याचे सांगण्यात येत आहे.
या दोन आरोपींना बुलढाणा जिल्ह्यातील देऊळगाव येथून मुंबई एटीएसने कारवाई करत ताब्यात घेतलं असून ते मुंबईकडे निघाले आहे.
मंगेश वायाळ व अभय शिंगणे असे अटक करण्यात आलेल्या आरोपीचे नाव आहे. मंगेश वायाळ हा ट्रक चालक असून अभय शिंगणे याचे देऊळगाव याठिकाणी मुख्य मार्गावर मोबाईल शॉपी आहे. हे दोघेही संभाजी भिडे यांच्या शिवप्रतिष्ठान संघटनेची संबंधित असल्याची माहिती समोर आली आहे. या दोघांनाही दारूचे व्यसन असून या दोघांनी अभय शिंगणे याच्या मोबाईल शॉपीतून ही धमकी दिल्याचे सांगण्यात येत आहे. विशेष म्हणजे हे दोघेही नात्याने मामा आणि भाचे आहेत. मंगेश हा नात्याने अभयचा मामा आहे. रात्री दोन वाजता मुंबई एटीएसने कारवाई करत देऊळगाव येथून या दोघांना ताब्यात घेतल आहे.
काल उपमुख्यमंत्री एकनाथ शिंदे यांच्या गाडीला बॉम्बने उडवून देण्याची धमकी देण्यात आली होती. मुंबई पोलिसांच्या गुन्हे शाखेने यांचा शोध घेऊन बुलढाणा पोलिसांच्या मदतीने ही कारवाई केली आहे. त्यांना देवळगाव, जिल्हा बुलढाणा येथून अटक करण्यात आली असून त्यांना चौकशीसाठी मुंबईत घेऊन जाण्यात येत आहे.
सध्या तपास यंत्रणा या दोघांनी एकनाथ शिंदेंना जीवे मारण्याची धमकी का दिली याचा शोध घेत आहे. प्राथमिक तपासानुसार, आरोपींनी नेमक्या कोणत्या कारणासाठी आणि कोणाच्या सांगण्यावरून हा ईमेल पाठवला, याचा शोध घेतला जात आहे. याबाबतचा तपास सुरू आहे.
