कराड ः विद्यानगर ता. कराड येथे अवैधरित्या पिस्टलची विक्री करण्यासाठी आलेल्या दोघांना कराड शहर गुन्हे प्रकटीकरण शाखेच्या पथकाने ताब्यात घेतले. ही कारवाई गुरूवारी दुपारी 12.30 वाजण्याच्या सुमारास केली. संशयितांकडून पोलिसांनी 65 हजार रूपये किमतीचे देशी बनावटीचे पिस्टल मॅक्झीनसह ताब्यात घेतले.
अभिषेक राजेंद्र नांगरे (वय 23, रा. मोरया कॉम्प्लेक्स आगाशिवनगर, ता. कराड), निकेतन राजेंद्र पाटील (वय 34 रा. मारूल ता. पाटण) अशी ताब्यात घेतलेल्यांची नावे आहेत.
याबाबत पोलिसांनी दिलेली माहिती अशी, गुरूवारी शहर गुन्हे प्रकटीकरण शाखेतील शशिकांत काळे यांना गोपनीय बातमीदारामार्फत माहिती मिळाली की, विद्यानगर कॉलेज रोडवर तारांगण बिल्डींग समोर एक जण व त्याचा साथीदार संयशितरित्या पिस्टल बाळगून फिरत असल्याची माहिती मिळाल्याने वरिष्ठ पोलीस निरीक्षक कोंडीराम पाटील यांचे मार्गदर्शनाखाली सहाय्यक पोलीस निरीक्षक गणेश कड, शशिकांत काळे, अमोल देशमुख, मुकेश मोरे, अमित पवार यांचे पथक तयार करून विद्यानगर येथील श्री शाहू गृह निर्माण संस्थाकडे जाणारे रोडवर तारांगण बिल्डींग समोरून अभिषेक नांगरे व निकेतन पाटील हे बोलत चालत जात असताना दिसले. त्यातील एकजण कमरेला हात लावून चालत होता. त्याबाबत पोलिसांना त्याचा संशय आल्याने पोलीस हवालदार शशिकांत काळे व अमोल देशमुख यांनी गाडीतून खाली उतरून पळत जाऊन एका संशयितास ताब्यात घेतले. त्यावेळी त्याचा साथीदार पळून जाऊ लागला. त्याला मुकेश मोरे, अमित पवार यांनी पळत जाऊन ताब्यात घेतले. ताब्यात घेतलेल्या संशयितांची पोलिसांनी अंगझडती घेतली असता त्यांचेकडे विक्रीसाठी आणलेले विनापरवाना देशी बनावटीचे पिस्टल मॅक्झीनसह मिळून आले. पोलिसांनी अभिषेक नांगरे व निकेतन पाटील या दोघांवर कराड शहर पोलिसात गुन्हा नोंद करून त्यांना अटक केली. अधिक तपास पोलीस उपनिरीक्षक डिसले करीत आहेत.
सदरची कारवाई पोलीस अधीक्षक समीर शेख, अप्पर पोलीस अधीक्षक आंचल दलाल, डीवायएसपी अमोल ठाकूर, वरिष्ठ पोलीस निरीक्षक कोंडीराम पाटील यांचे मार्गदर्शनाखाली गुन्हे प्रकटीकरण शाखेचे सहाय्यक पोलीस निरीक्षक गणेश कड, पोलीस हवालदार शशिकांत काळे, अमित पवार, अशोक वाडकर, कुलदीप कोळी, मुकेश मोरे, दिग्विजय सांडगे, अमोल देशमुख, संग्राम पाटील यांनी केली.
दीड वर्षात 90 पिस्टल जप्त
सातारा जिल्हा पोलीस दलाकडून नोव्हेंबर 2022 पासून आजपर्यंत 90 देशी बनावटीची पिस्टल, तीन बारा बोअर बंदुक, एक रायफल, 199 जिवंत काडतुस, 385 रिकाम्या पुंगळ्या, एक रिकामे मॅगझीन असा मुद्देमाल जप्त करण्यात आला आहे.
