कराड ः राज्याचे माजी सहकार व पणन मंत्री आमदार बाळासाहेब पाटील यांच्या मार्गदर्शनाखाली कराड-उत्तर विधानसभा मतदारसंघात, कराड उत्तर राष्ट्रवादी काँग्रेस पार्टी शरदचंद्र पवार पक्षाचा महिला मेळावा, आदरणीय पी. डी. पाटीलसाहेब स्फुर्ती स्थळ, यशवंतनगर, तालुका-कराड शनिवार दिनांक 20 जुलै 2024 रोजी सकाळी 10.00 वाजता आयोजित करण्यात आला असून, या मेळाव्यास मतदारसंघातील माता भगिनींनी हजारोच्या संख्येने उपस्थित रहावे असे आवाहन राष्ट्रवादी काँग्रेस शरदचंद्र पवार पक्षाचे जिल्हाध्यक्ष सुनील माने यांनी केले.
ते यशवंनगर येथे महिला मेळाव्याच्या नियोजनासाठी आयोजित केलेल्या कार्यकर्त्यांच्या आढावा बैठकीप्रसंगी बोलत होते.
यावेळी देवराजदादा पाटील, शहाजीराव क्षीरसागर, कांतीलाल पाटील, मानसिंगराव जगदाळे, जशराज पाटील (बाबा), बबनराव कदम, सुहास बोराटे, सी. एम. पाटील, प्रशांत यादव, प्रभावती माळी, सुरेखा डुबल, सह्याद्रि कारखान्याचे संचालक, जिल्हा परिषद, पंचायत समितीचे आजी माजी पदाधिकारी यांची प्रमुख उपस्थिती होती.
खासदार सुप्रियाताई सुळे यांच्या उपस्थितीत हा महिला मेळावा होत असून, या मेळाव्यास मतदारसंघातून मोठ्या संख्येने महिला-युवती उपस्थित राहण्यासाठी आजपासुन कार्यकर्त्यांनी गावोगावी बैठका घेऊन या मेळाव्याची जनजागृती करावी, स्वयंस्फूर्तीने महिला एकत्रित होण्यासाठी सर्वांनी प्रयत्नशील राहावे, असे मत मान्यवरांनी यावेळी व्यक्त केले.
कार्यक्रमाचे स्वागत व प्रास्ताविक तालुकाध्यक्ष देवराजदादा पाटील यांनी केले, आभार प्रशांत यादव यांनी मानले.
या आढावा बैठकीस कराड-उत्तर विधानसभा मतदार संघातील सर्वच गावचे प्रमुख पदाधिकारी, युवा कार्यकर्ते मोठ्या संख्येने उपस्थित होते.
