कराड ः कराड शहर व परिसरात प्रवासादरम्यान वयस्कर दाम्पत्यास लुटणाऱ्या परजिल्ह्यातील माय-लेकीला कराड शहर गुन्हे प्रकटीकरण शाखेने नांदेड येथून ताब्यात घेतले.
अरूणा प्रभू मोहिते व तिची मुलगी (रा. नांदेड, जि. नांदेड) अशी ताब्यात घेतलेल्या माय-लेकीची नावे आहेत.
याबाबत पोलिसांनी दिलेली माहिती अशी, कोल्हापूर नाका ते कोयना वसाहत मलकापूर याठिकाणी प्रवासा दरम्यान एका वयस्कर दाम्पत्यास या माय-लेकीनी हात चलाखी करून लुटल्याची घटना घडली होती. याबाबत कराड शहर पोलिसात गुन्हा नोंद करण्यात आला होता. त्याबाबत डीवायएसपी अमोल ठाकूर, वरिष्ठ पोलीस निरीक्षक प्रदीप सुर्यवंशी यांनी गुन्हे अन्वेषणचे पोलीस उपनिरीक्षक राजू डांगे यांना त्या माय-लेकीचा शोध घेण्याच्या सूचना दिल्या होत्या. त्यानुसार राजू डांगे यांच्या पथकाने दिरंगाई न करता सीसीटीव्ही फुटेज प्राप्त करून त्या माय-लेकीचा शोध सुरू केला. त्या दोघींची भाषा परजिल्ह्यातील होती. या माहितीच्या आधारे राजू डांगे यांनी सदरचे सीसीटीव्ही फुटेज राज्यातील विविध जिल्ह्यातील पोलीस ठाणेना पाठवून शोध घेतला असता अरूणा व तिची मुलगी ह्या नांदेड जिल्ह्यातील असल्याची माहिती प्राप्त झाली. त्या माहितीच्या आधारे कराड शहर गुन्हे अन्वेषण पथकाने नांदेड येथून माय-लेकीला ताब्यात घेतले.
सदरची कारवाई कराड शहर गुन्हे प्रकटीकरण शाखेचे पोलीस उपनिरीक्षक राजू डांगे, सहाय्यक फौजदार रघुवीर देसाई, संजय देवकुळे, पोलीस हवालदार शशि काळे, संतोष पाडळे, कुलदिप कोळी, महेश शिंदे, आनंदा जाधव, मुकेश मोरे, दिग्विजय सांडगे, अमोल देशमुख, सोनाली पिसाळ यांनी केली.
अधिक तपास पोलीस उपनिरीक्षक राजू डांगे करीत आहेत.
