कराड : कराड दक्षिण मतदार संघातील कापील येथे विधानसेला बोगस मतदान झाल्याचे उघडकीस आले असून कापील मधील माजी ग्रा.पं.सदस्य गणेश पवार यांनी पुरव्यासह बोगस मतदार समोर आणले आहेत. गावात रहिवासी नसलेल्या 9 मतदारांनी मतदान केले आहे. एका महिला मतदाराने कोल्हापूरचा पत्ता असणाऱ्या आधारकार्डच्या पुराव्यावर कापील येथे मतदान केले आहे. काही मतदारांची नावे कापील व गोळेश्वर या दोन्ही ठिकाणच्या मतदार याद्यांमध्ये आढळून आली असून ती दोन्ही गावचे रहिवाशी सुद्धा नाहीत. तर गोळेश्वरमध्ये 75 बोगस मतदारांची नावे आढळून आल्याची माहिती माजी ग्रामपंचायत सदस्य गणेश पवार यांनी पत्रकार परिषदेत पुराव्यासह सादर केली.
दरम्यान बोगस मतदारांवर फौजदारी गुन्हा दाखल करावा, मतदार नोंदणी करणाऱ्या अधिकाऱ्यांची चौकशी करावी, अशी मागणी गणेश पवार यांनी केली असून संबंधितांवर कारवाई झाली नाही तर 14 ऑगस्ट पासून कराड तहसील कार्यालयासमोर बेमुदत उपोषण करणार असल्याचा इशारा पवार यांनी दिला आहे. कराड शासकीय विश्रामगृहात सोमवारी पत्रकार परिषद झाली.
विरोधी पक्ष नेते खा. राहूल गांधी यांनी बोगस मतदानावरून देशभर रान उठविले असताना कराड दक्षिण मतदार संघात बोगस मतदान झाल्याचे गणेश पवार यांनी उघडकीस आणले आहे. त्यांनी दिलेली माहिती अशी की, प्रियांका श्रीकांत चव्हाण, रूई माईकल काळे, स्वाती सुनील मोरे, शितल सुरेश सावंत, किशोर जयवंत जाधव, सुरेश बबन मदने, मधुकर डिसले, सुनीता सुरेश जाधव, स्वाती हणमंत पाटील या व्यक्ती कापील गावच्या रहिवाशी नसताना यांची नावे कापीलच्या मतदार यादीमध्ये आली आहेत. या मतदारांनी यापूर्वी ग्रामपंचायत, लोकसभा अथवा अन्य निवडणुकीमध्ये मतदान केलेले नाही. विधानसभा निवडणुकीला त्यांची नावे अचानक मतदार यादीत आली आणि त्यांनी मतदान केले. गावात त्यांचे घर, जमीन नाही. ते गावचे रहिवाशी नाहीत. अचानक हे मतदार आले कुठून? महसूलच्या अधिकाऱ्यांनी तसा पंचनामा केला असून या मतदारांची नावे मतदार यादीत कशी समाविष्ट झाली याबाबत काही ठोस पुरावे आढळून येत नसल्याने मंडल अधिकारी यांनी केलेल्या पंचनाम्यात म्हटले आहे.
या शिवाय विनोद मोहन कदम आणि शिवम मोहन कदम यांची नावे कापील व गोळेश्वर या दोन्ही गावात आढळून आली आहेत. तृप्ती उमेश गुणे या महिला मतदाराचे नाव कोल्हापूरचा पत्ता असणाऱ्या आधार कार्डच्या आधारे कापील गावी नोंदवले गेले आहे. त्यांचाही गावात राहिवास नाही. तर आधार कार्डवर पत्ताच नाही असे गोळेश्वर येथे 75 मतदार आढळून आले आहेत. या प्रकरणांची चौकशी करावी. या व्यक्ती कापील व गोळेश्वर मध्ये रहिवाशी नसताना त्यांची नावे मतदार यादीत कशाच्या आधारे लावली गेली ? कोणी लावली याची चौकशी व्हावी. संबंधितांवर फौजदारी गुन्हे दाखल करावेत, अशी मागणी गणेश पवार यांनी केली आहे. जर कारवाई झाली नाही तर 14 ऑगस्ट पासून तहसील कार्यालयामोर बेमुदत उपोषण करणार असल्याचा इशारा गणेश पवार यांनी पत्रकार परिषदेत दिला आहे.
अनोळखी व्यक्ती कापीलचे मतदार..
गावात घर नाही, जमीन नाही, रेशनकार्ड नाही, शिवाय ते गावचे रहिवाशी नाहीत, अशा 9 जणांनी बोगस कागदपत्रांच्या आधारे विधानसभेला मतदान केले आहे. त्यांची नावे कशाच्या अधारे मतदार यादीत नोंदली गेली, ती कोणी नोंदवली, बीएलओ, निवडणूक निर्णय अधिकार्यांनी याची पडताळणी का केली नाही, असे प्रश्न गणेश पवार यांनी उपस्थित केले आहेत.
गोळेश्वरमध्ये 75 मतदार बोगस असल्याचा दावा ..
गोळेश्वर गावच्या मतदार यादीत 75 नावे बोगस असल्याचे गणेश पवार यांनी निदर्शनास आणले असून दोघा मतदारांची नावे कापील व गोळेश्वर या दोन्ही गावच्या मतदार यादीमध्ये समाविष्ट आहेत. मतदान नोंदणीसाठी आधार कार्ड व लाईटबिल हा पुरावा जोडला गेला आहे. पण त्या आधारकार्डवर पत्ताच नाही. तर लाईटबील दुसऱ्याचे नावचे असल्याचे गणेश पवार यांनी सांगितले.
