शरद पवार यांचा महायुतीला धक्का, भाजपचे एकनिष्ठ नामदेव ताकवणे करणार शरद पवार गटात प्रवेश
पुणे : पुण्यातून मोठी बातमी समोर येत आहे. लोकसभा निवडणुकीच्या पार्श्वभूमीवर भाजपला मोठा धक्का बसला आहे. भाजपचे माजी जिल्हाध्यक्ष नामदेव ताकवणे हे आज राष्ट्रवादी शरदचंद्र पवार गटात प्रवेश करणार आहेत.
ताकवणे यांनी शरद पवार यांची पुण्यातील मोदी बागेत भेट घेऊन चर्चा केली. त्यानंतर ताकवणे आज राष्ट्रवादी शरदचंद्र पवार गटात जाहीर प्रवेश करणार आहेत. भाजपचे एकनिष्ठ म्हणून नामदेव ताकवणे यांना ओळख जातं. शरद पवार यांच्या उपस्थितीमध्ये नामदेव ताकवणे आज यवत मधील सभेत पक्षात प्रवेश करणार आहेत.
राहुल कुल यांच्यावर भीमा पाटस साखर कारखाना प्रकरणात नामदेव ताकवणे यांनी गंभीर आरोप केले होते. मात्र आता राहुल कुल हेच भाजपात आल्यानं नामदेव ताकवणे हे पक्षावर नाराज असल्याची चर्चा आहे. त्यामुळे आज ताकवणे हे राष्ट्रवादी शरदचंद्र पवार पक्षात प्रवेश करणार आहेत. ऐन लोकसभा निवडणुकीच्या तोंडावर हा भाजपसाठी मोठा धक्का मानला जात आहे.
दरम्यान दुसरीकडे बारामती लोकसभा निवडणुकीच्या पार्श्वभूमीवर देखील शरद पवार यांनी मोठी खेळी खेळली आहे. पुण्यश्लोक आहिल्यादेवी होळकर यांचे थेट वंशज भुषणसिंह राजे होळकर राष्ट्रवादी शरद पवार गटात जाणार आहेत. राजे भुषणसिंह होळकर यांनी राष्ट्रवादी शरद पवार गटात प्रवेश केल्यास धनगर जमाजाची मतं मोठ्या प्रमाणात पवारांना मिळू शकतात असा अंदाज व्यक्त करण्यात येत आहे. दरम्यान भुषणसिंह होळकर हे उपमुख्यमंत्री अजित पवार यांच्या संपर्कात होते, अशी माहिती देखील समोर आली आहे. त्यांनी काही दिवसांपूर्वी मंत्री हसन मुश्रीफ यांच्यासोबत पत्रकार परिषद घेतली होती. मात्र ते आता शरद पवार गटात प्रवेश करणार आहेत. हा अजित पवार यांच्यासाठी धक्का मानला जात आहे.
