कराड ः वारूंजी येथील नामांकित व्यावसायिकाच्या खुनाचा प्रयत्न करून फरार झालेल्या संशयित आरोपीस कराड शहर गुन्हे प्रकटीकरण शाखेने सापळा रचून अटक केली.
कमरअली वाहीद मुतवली (वय 28, रा. 190 गुरूवार पेठ, कराड) असे अटक केलेल्या संशयित आरोपीचे नाव आहे.
याबाबत पोलिसांनी दिलेली माहिती अशी, मागील चार महिन्यापूर्वी कराड शहरालगत असलेले सॅफरॉन हॉटेलजवळ जुना जमिनीचा वाद उफाळून एका व्यावसायिकास जिवे मारण्याचा प्र्रयत्न करून कमरअली मुतवली हा फरार होता. याबाबत कराड शहर पोलिस ठाण्यात परस्परविरोधी फिर्यादी दाखल झाल्या होत्या. यामध्ये तात्काळ तीन संशयितांना अटक करण्यात आली होती. मात्र, मुख्य संशयित आरोपी कमरअली हा गुन्हा घडलेपासून फरार होता. जमिनीचा वाद हा वर्षानुवर्ष जुना असल्याने त्यातून पुन्हा गंभीर गुन्हा घडण्याची शक्यता नाकारता येत नव्हती. त्या परिस्थितीचे गांभीर्य ओळखून डीवायएसपी अमोल ठाकूर, वरिष्ठ पोलीस निरीक्षक प्रदीप सुर्यवंशी यांनी कराड शहर गुन्हे प्रकटीकरण शाखेचे पोलीस उपनिरीक्षक राजू डांगे यांना फरार संशयित आरोपीचा शोध घेण्याच्या सूचना दिल्या होत्या. त्याअनुषंगाने राजू डांगे यांना गोपनीय बातमीदारांकडून माहिती मिळाली की, कमरअली हा कराड शहर परिसराच्या आजूबाजूस वावरत असल्याची माहिती डांगे यांना मिळाली. त्यांनी शहर परिसराच्या आसपास छापा टाकून कमरअली यास पाठलाग करून अटक केली.
सदरची कारवाई गुन्हे प्रकटीकरण शाखेचे पोलीस उपनिरीक्षक राजू डांगे, पोलीस उपनिरीक्षक प्रविण जाधव, सहाय्यक फौजदार संजय देवकुळे, पोलीस हवालदार शशि काळे, संतोष पाडळे, कुलदीप कोळी, महेश शिंदे, मुकेश मोरे, दिग्विजय सांडगे, अमोल देशमुख, सोनाली पिसाळ यांनी केली.
