कराड : मलकापूर येथील बैल बाजार रोड व गोकाक पेट्रोल पंपाजवळ बेकायदेशीर रित्या विदेशी दारूची वाहतूक करणाऱ्यास कराड शहर गुन्हे प्रकटीकरण शाखेने ताब्यात घेतले त्याच्याकडून एक बोलोरो गाडीसह विदेशी दारू असा एकूण सात लाखाचा मुद्देमाल जप्त करण्यात आला आहे.
ऋषिकेश दिलीप कणसे (वय 26 रा. शेणोली ता. कराड, जि. सातारा) असे दारू वाहतूक प्रकरणी ताब्यात घेतलेल्या युवकाचे नाव आहे.
याबाबत पोलिसांनी दिलेली माहिती अशी, पोलीस अधीक्षक समीर शेख, अप्पर पोलिस अधीक्षक आचल दलाल, डीवायएसपी अमोल ठाकूर व कराड शहर पोलीस ठाण्याचे वरिष्ठ पोलीस निरीक्षक कोंडीराम पाटील यांना आगामी लोकसभा निवडणुकीच्या अनुषंगाने महाराष्ट्र शासनाने लागू केलेल्या आचारसंहिता काळात कराड शहरातील सर्व बेकायदेशीर धंद्यावर तसेच बेकायदेशीर हालचालीवर बारकाईने लक्ष ठेवून ठोस कारवाई करण्याबाबत आदेश दिले होते. त्यानुसार वरिष्ठ पोलीस निरीक्षक कोंडीराम पाटील यांनी गुन्हे प्रकटीकरण शाखेचे पोलीस उपनिरीक्षक पतंग पाटील यांचे मार्गदर्शनाखाली एक पथक तयार करण्यात आले होते. शनिवारी वरिष्ठ पोलीस निरीक्षक कोंडीराम पाटील यांना बातमीदाराकडून माहिती मिळाली की मलकापूर बैल बाजार रोड व गोकाक पेट्रोल पंपाजवळ एक जण एका पांढऱ्या रंगाच्या बोलेरो गाडीतून बेकायदेशीर रित्या विदेशी दारूची वाहतूक करणार आहे. त्याबाबत गुन्हे प्रकटीकरण शाखेचे पतंग पाटील, पोलीस उपनिरीक्षक कृष्णा डिसले यांना तात्काळ कारवाई करण्याबाबतच्या सूचना कोंडीराम पाटील यांनी दिल्या. कराड शहर गुन्हे प्रकटीकरण पथक मलकापूर बैलबाजार रोडवर गोकाक पेट्रोल पंपाजवळ सापळा रचून थांबले असता एक पांढऱ्या रंगाची बोलेरो गाडी मलकापूर कडून कराड बाजूकडे जात असताना दिसून आली. त्या गाडीस थांबण्याचा इशारा करतात तो चालक चकवा देऊन पळून जात असताना पोलीस उपनिरीक्षक पतंग पाटील, पोलीस उपनिरीक्षक कृष्णा डिसले व डीबी पथकाने त्या गाडीचा पाठलाग करून त्यास ताब्यात घेतले व गाडीची झडती घेतली असता गाडीमध्ये एक लाख 16 हजार 160 रुपये किमतीची विदेशी दारू मिळून आली असून या प्रकरणी ऋषिकेश कणसे याला पोलिसांनी ताब्यात घेतले आहे. त्याच्याकडून बोलेरो गाडी व विदेशी दारू असा एकूण सात लाख रुपयांचा मुद्देमाल जप्त करण्यात आला आहे. याप्रकरणी त्याच्यावर कराड शहर पोलीस ठाण्यात गुन्हा नोंद करण्यात आला आहे. अधिक तपास वरिष्ठ पोलीस निरीक्षक कोंडीराम पाटील यांचे मार्गदर्शनाखाली करण्यात येत आहे.
सदरची कामगिरी पोलीस अधीक्षक समीर शेख, अप्पर पोलीस अधीक्षक आचल दलाल, डीवायएसपी अमोल ठाकूर, वरिष्ठ पोलीस निरीक्षक कोंडीराम पाटील यांच्या मार्गदर्शनाखाली गुन्हे प्रकटीकरण शाखेचे पोलीस उपनिरीक्षक पतंग पाटील, पोलीस उपनिरीक्षक कृष्णा डिसले, सहाय्यक फौजदार रघुवीर देसाई, संजय देवकुळे, पोलीस हवालदार शशिकांत काळे, अमित पवार, कुलदीप कोळी, संतोष पाडळे, संग्राम पाटील, अमोल देशमुख, मुकेश मोरे, दिग्विजय सांडगे, महेश शिंदे, आनंदा जाधव, सोनाली पिसाळ यांनी केली.
