पंतप्रधानांच्या सुरक्षेत पुन्हा चूक महिलेने घेतली गाडीसमोर उडी
रांची : देशाचे पंतप्रधान नरेंद्र मोदी यांच्या सुरक्षेमध्ये बुधवारी पुन्हा एक मोठी चूक झाली आहे. पंतप्रधानांच्या गाडीसमोर अचानक एका महिलेने उडी घेतली. चालकाने प्रसंगावधान साधून करकचून ब्रेक मारलं, त्यामुळे पुढचा अनर्थ टळला.
पंतप्रधान बुधवारी रांचीच्या दौऱ्यावर होते. एका महिलेने अचानक गाडीसमोर येण्याचा प्रयत्न केल्याने संभाव्य अपघात टळला. सदरील महिलेला पोलिसांनी चौकशीसाठी ताब्यात घेतलं आहे. या घटनेमुळे पुन्हा एकदा पंतप्रधानांच्या सुरक्षेमधली कमतरता दिसून आली.
रांचीमधील कोतवाली ठाणा आणि लालपूर ठाण्याच्या हद्दीतील हे प्रकरण आहे. महिलेला काहीतरी कौटुंबिक अडचण असून ती पंतप्रधानांना भेटण्यासाठी इच्छूक होती, असं सांगितलं जात आहे. सदरील महिला पंतप्रधान येण्याची वाट बघत होती. त्यांची गाडी दिसताच तिने गाडीसमोर उडी घेतली.
पंतप्रधानांच्या ताफ्यातील सुरक्षा यंत्रणेमध्ये अशा पद्धतीने कुचराई झाल्याने आश्चर्य व्यक्त होत आहे. यापूर्वीदेखील दोनवेळा पंतप्रधानांच्या सुरक्षेसंदर्भात प्रश्नचिन्ह उपस्थित झाले होते. बुधवारी रांचीमध्ये असाच प्रसंग घडला.
