कराड : भाऊ आणि आईचा खून केल्याप्रकरणी न्यायालयाने एकाला आजन्म कारावासाची शिक्षा ठोठावली. येथील अतिरीक्त जिल्हा व सत्र न्यायालयाचे न्या. दिलीप पतंगे यांनी बुधवारी ही शिक्षा ठोठावली.
राकेश गजानन घोडके (वय ५०, रा. श्रीराम निवास, आझाद कॉलनी, आगाशिवनगर, कराड) असे शिक्षा सुनावलेल्या आरोपीचे नाव आहे. राजेश गजानन घोडके (वय ४०), जयश्री गजानन घोडके (वय ६३) असे खून झालेल्यांचे नाव आहे.
सरकार पक्षाचे वकील अ‍ॅड. आर. डी. परमाज यांनी दिलेल्या माहितीनुसार, आगाशिवनगर येथील आझाद कॉलनीतील श्रीराम निवास येथे घोडके कुटूंब वास्तव्यास होते. त्यांच्या घराचा वरचा मजला तसेच खालच्या मजल्यावरील वाटणीवरुन राकेश याचा भाऊ राजेश व आई जयश्री यांच्याशी वाद होता. ९ एप्रिल २०१८ रोजी राकेश आणि राजेश याच्ंयात सकाळी पुन्हा वाद झाला. त्यावेळी राकेश याने आई जयश्री व भाऊ राजेश यांच्यावर हल्ला केला. त्यांना बेदम मारहाण करीत डोक्यात पाईप घातली. त्यानंतर धारदार शस्त्राने भावासह व आईचा खून केला. याप्रकरणी अलंकार शामराव जोशी यांनी कराड शहर पोलीस ठाण्यात तक्रार दिली होती.
या गुन्ह्याचा तपास तत्कालीन पोलीस निरीक्षक आर. एच. राजमाने यांनी केला. खटल्याची सुनावणी न्या. दिलीप पतंगे यांच्यासमोर झाली. सरकारी वकील आर. डी. परमाज यांनी सरकार पक्षाची बाजू मांडली. त्यांनी एकूण बारा साक्षीदार तपासले. न्यायालयाने या गुन्ह्यात आरोपी राकेश घोडके याला दोषी धरुन आजन्म कारावासाची शिक्षा ठोठावली. सरकार पक्षाला पैरवी अधिकारी एस. व्ही. पाटील, हवालदार एस. व्ही. खिलारे, एस. बी. भोसले, ए. आर. पाटील यांनी सहकार्य केले.
