पाटण : पाटण येथे एकावर धारधार शस्त्राने वार करून खून केल्याची घटना शनिवारी रात्रीच्या सुमारास घडली आहे. प्रकाश परशुराम पवार (मानेवाडी, सातारा), असे खून झालेल्याचे नाव आहे. खून झाल्यानंतर संबधित व्यक्तीचा मृतदेह हा रक्ताच्या थारोळ्यात रात्रभर स्मशानभूमीत पडून होता. सदर मृतदेह सकाळी स्मशान भूमीच्या परिसरात गेलेल्या नागरिकांच्या निदर्शनास आल्यानंतर त्यांनी पोलिसांना तात्काळ याची माहिती दिली. त्यानंतर खुनाचा प्रकार उघडकीस आला. याप्रकरणी संतोष चंद्रकांत पवार यांनी पाटण पोलीस ठाण्यात फिर्याद दिली असून याप्रकरणी पाटण पोलिसात अज्ञातावर खुनाचा गुन्हा नोंद झाला आहे.
याबाबत पोलिसांनी दिलेली माहिती अशी, पाटण शहरातील चाफोली रोड परिसरात असलेल्या बीएसएनएल कार्यालयासमोरील स्मशानभूमीमध्ये रक्ताच्या थारोळ्यात प्रकाश पवारचा मृतदेह आढळून आला. अज्ञाताने धारधार शस्त्राने डोक्यात, कपाळावर आणि उजव्या कानावर वार करून ही हत्या केली आहे. खून झालेली व्यक्ती कातकरी समाजातील तसेच मूळची मानेवाडी, सातारा येथील आहे. सासरवाडी असलेल्या पाटणमध्ये तो राहत होता.
या घटनेमागील कारण अद्याप स्पष्ट झालेले नाही. संशयिताला ताब्यात घेतल्यानंतरच हत्येमागील कारणाचा उलगडा होईल, अशी माहिती पोलिसांनी दिली. संशयिताच्या शोधासाठी पोलिसांची पथके रवाना करण्यात आली आहेत. अधिक तपास सहाय्यक पोलीस निरीक्षक संदीप कामत करत आहेत.
