कराड ः कार्वे चौकीजवळ झालेल्या अपघातात दुचाकीस्वार ठार झाल्याची घटना आज दुपारी साडेचारच्या सुमारास घडली. अरविंद मधुसूदन चिपाडे (वय, ६४. रा. किल्लेमच्छिंद्रगड, ता. वाळवा, जि.सांगली) असे ठार झालेल्या दुचाकीस्वाराचे नाव आहे.
पोलिसांची व घटनास्थळावरुन मिळालेली माहिती अशी ः अरविंद चिपाडे हे आपल्या पत्नी स्नेहल यांच्यासह कराडला आले होते. ते कराडमधील काम आटोपून गावी किल्ले मच्छिंद्रगडला दुचाकीवरून निघाले होते. दुपारी साडेचारच्या सुमारास ते कार्वे चौकीपासुन काही अंतरावर रस्त्याकडेला थांबले. याचवेळी कार्वे गावाकडून कृष्णा कारखान्याकडे ऊस वाहतूक करणारा ट्रॅक्टर वेगाने निघाला होता. काही कळण्याच्या आतच भरधाव ट्रॅक्टरने अरविंद चिपाडे यांना धडक दिली. त्यात ते गंभीर जखमी झाले. अपघाताची माहिती मिळाल्यानंतर तातडीने चिपाडे यांना उपचारासाठी रुग्णालयात दाखल करण्यात आले. मात्र त्यांचा तत्पुर्वीच मृत्यू झाल्याचे वैद्यकीय अधिकाऱ्यांनी सांगीतले. श्री. चिपाडे हे कृष्णा सहकारी साखर कारखान्याच्या वाहतूक विभागातून पाच वर्षांपूर्वी निवृत्त झाले होते. आरटीओ एजंट म्हणून सांगली व इस्लामपूर येथे त्यांनी काम केले होते. त्यांच्या निधनाबद्दल सर्वत्र हळहळ व्यक्त होत आहे.
