कराड : राजकीय विषयावर चर्चा सुरू असताना शिवीगाळ करू नका असे सांगितल्याचा राग मनात धरत युवकावर सशस्त्र हल्ला केल्याची घटना विजयनगर (ता. कराड) येथे घडली आहे. कोयत्याने डोक्यात, पाठीवर तसेच हातावर वार करण्यात आल्याने युवक गंभीर जखमी झाला आहे. याप्रकरणी कराड शहर पोलीस ठाण्यात तीन संशयितांविरोधात गुन्हा नोंद करण्यात आला आहे.
रोहन हनुमंत ताटे (वय 31, मुंढे) असे जखमीचे नाव असून त्याने याप्रकरणी शहर पोलीस ठाण्यात फिर्याद दिली आहे. सागर तानाजी चव्हाण (रा. विजयनगर) यांच्या दोन सहकाऱ्यांनी विरोधात गुन्हा नोंद करण्यात आला आहे.
रोहन ताटे 29 जून रोजी रात्री साडेनऊ वाजण्याच्या सुमारास विजयनगर येथील एमएसईबी चौकात भुर्जी पाव खाण्यासाठी गेला होता. त्यावेळी त्या ठिकाणी सागर चव्हाण आपल्या दोन मित्रांसोबत भुर्जी पाव खाण्यासाठी आलो होतो. त्यावेळी राजकीय चर्चा करत सागर याने रोहन याला शिवीगाळ करण्यास सुरुवात केली. त्यावेळी रोहन याने शिवीगाळ करू नका असे सागर याला सांगितले. त्यानंतर त्याचा राग मनात धरून तुला आता जिवंत ठेवत नाही असे म्हणत सागर याने रोहन याच्या डोक्यावर पाठीवर तसेच हातावर आणि कोयत्याने वार केला. सशस्त्र हल्ला सुरू असताना रोहन याला सागर याच्यासोबत आलेल्या दोघांनी लाथाबुक्क्यांनी मारहाण केली असल्याचे पोलीस ठाण्यात दाखल फिर्यादीत नमूद करण्यात आले आहे.
घटनेनंतर जखमी रोहन याला त्याच्या नातेवाईकांनी कृष्णा हॉस्पिटलमध्ये उपचारासाठी दाखल केले आहे.
