कराड ः सैदापूर कॅनॉल ते मसूर जाणाऱ्या रोडवर सूर्या मस्तानी कॅफेच्या पाठीमागील बाजूस बेकायदेशीर विनापरवाना घरगुती गॅस टाकीतून पाईपच्या सहाय्याने रिक्षात गॅस भरताना पोलिसांनी कारवाई केली. यामध्ये पोलिसांनी पंधरा हजारांचा मुद्देमाल जप्त केला असून याप्रकरणी दोघांवर गुन्हा नोंद करण्यात आला आहे. याबाबतची फिर्याद पोलीस हवालदार महेश शिंदे यांनी कराड शहर पोलिसात दिली आहे.
स्वप्निल सुनिल यादव वय 29, रा. सैदापूर कॅनॉल, ता. कराड व शिवाजी जाधव अशी गुन्हा नोंद झालेल्यांची नावे आहेत.
याबाबत पोलिसांनी दिलेली माहिती अशी, सैदापूर कॅनॉल ते मसूर जाणाऱ्या रोडवर सूर्या मस्तानी कॅफेच्या पाठीमागील बाजूस स्वप्निल यादव हा दररोज उघड्यावर बेकायदेशीर विनापरवाना सार्वजनिक जिवीतास व मालमत्तेस धोका होईल अशा स्थितीत घरगुती वापराचे गॅस सिलेंडर रिक्षामध्ये व अन्य वाहनामध्ये भरत असल्याची माहिती पोलिसांना मिळाली. त्या माहितीच्या आधारे सहाय्यक पोलीस निरीक्षक राजेश माळी यांनी शनिवारी सकाळी साडे नऊ वाजण्याच्या सुमारास सैदापूर कॅनॉल ते मसूर जाणाऱ्या रोडवर सूर्या मस्तानी कॅफेच्या पाठीमागील बाजूस छापा टाकला असता तेथे स्वप्निल हा अवैधरित्या रिक्षात गॅस भरताना आढळून आला. पोलिसांनी त्याच्याकडे शासनाकडून परवाना घेतला आहे का तसेच सदरचे काम कोणासाठी करत असल्याचे विचारले असता त्याने सदरचे काम शिवाजी जाधव यांचेसाठी त्यांच्या सांगण्यावरून करत असल्याचे सांगितले. पोलिसांनी स्वप्निल याच्याकडून पाच हजार रूपये किमतीचा इलेक्ट्रीक गॅस क्रॉम्प्रेसर, पाच हजार रूपये किमतीच्या घरगुती गॅस सिलेंडर टाक्या, 600 रूपये किमतीचे दोन नोझल, चार हजार रूपये किमतीचा वजनकाटा असा एकूण 14 हजार 600 रूपये किमतीचा मुद्देमाल जप्त केला आहे.
