कराड ः विरोधात तक्रार केल्याच्या कारणावरून सतनाम एजन्सीच्या मॅनेजरला कोयता, हॉकी स्टीक, दांडक्याने सातजणांनी बेदम मारहाण केल्याची घटना मुंढे गावच्या हद्दीत घडली होती. याप्रकरणी पोलिसांनी तिघांना अटक केली होती. त्यांना आज न्यायालयात हजर केले असता मंगळवारपर्यंत पोलीस कोठडी सुनावण्यात आली आहे. तर उमेश चंदवानी, अनिल चंदवानी, आण्णा यांचे कॉल डिटेल्स व सीसीटीव्ही फुटेज तपासण्याचे काम सुरू असल्याची माहिती पोलिसांनी दिली.
रितेश घारे (रा. घारेवाडी, ता. कराड), सूरज पाटील (रा. बाबरमाची, ता. कराड), कपिल लोंढे (रा. खोडशी, ता. कराड) अशी पोलीस कोठडी मिळालेल्यांची नावे आहेत.
याबाबत पोलिसांनी दिलेली माहिती अशी, निखील पोपटानी हे अनिल गोपीचंद बसंतानी यांचे न्यायालयातील कामकाज पाहतात. बसंतानी व उमेश चंदवानी, अनिल चंदवानी यांचा मुंढे येथील जमीनीच्या मालकी हक्कावरून न्यायालयात दावा सुरू आहे. निखील पोपटांनी हे त्यांचे दैनंदिन कामकाज करत असताना त्यांना संबंधित जागेवर उमेश चंदवानी व अन्य लोक जमले होते. त्यावेळी पोपटांनी कराडकडे जाताना उमेश चंदवानीला दिसले. त्यावर त्यांनी त्याला पकडा असे ओरडून सांगितले. त्यावेळी निखील पोपटानी हे घाबरून गाडी घेऊन तेथून पुढे निघुन गेले. विमानतळापुढील एका पेट्रोलपंपाच्या पुढे गेल्यावर पाठीमागून चारचाकी गाडीतुन आलेल्या उमेश, अनिल चंदवानी व आण्णा यांनी गाडी आडवी मारून त्यांना थांबविले. त्यावेळी उमेश चंदवानी याने पोपटांनी यांच्या डोक्यात कोयत्याने वार केला. त्यानंतर अनिल चंदवानी व आण्णा याने हॉकी स्टीक व लाकडी दांडक्याने मारहाण केली. त्यानंतर संबंधितांनी पोपटानी यांच्या हाताच्या बोटातील पावणेदोन तोळ्याची सोन्याची अंगठी, मोबाईल, व बॅगेतील रोख रक्कम असा मिळून चार लाख 61 हजार रुपयांचा मुद्देमाल काढून घेतला. त्यावरून सात जणांवर गुन्हा दाखल करण्यात आला होता. त्यामधील तिघांना पोलिसांनी अटक करून न्यायालयात हजर केले असता मंगळवारपर्यंत पोलीस कोठडी सुनावण्यात आली आहे. तर उमेश चंदवानी, अनिल चंदवानी, आण्णा यांचे कॉल डिटेल्स व सीसीटीव्ही फुटेज तपासण्याचे काम सुरू असल्याची माहिती पोलिसांनी दिली.
